Акыллылар мандарин кабыгын ташламый!

Мандаринның кабыгын моңарчы чүпкә ыргыткан булсагыз, бүгеннән җыеп барыгыз һәм сәламәтлегегезне ныгыту өчен кулланыгыз.

Дисбактериоз һәм ашкайнату проблемалары булганда
Кипкән мандарин кабыгын каһвә тарткычта ваклагыз. Аксыл әфлисун төсендәге порошок барлыкка килер. Шуны һәр ризыкка тәмләткеч урынына 1 чәй калагы кушып ашагыз. Ул метеоризм һәм ашказаны-эчәк авыруларыннан ярдәм итә. Аны каһвәгә кушып эчәргә дә була.

Бронхиттан
2 аш кашыгы кипкән мандарин кабыгына 1,5 стакан кайнар су коегыз. Шуны сүлпән утта 5 минут тотыгыз да, уттан алып, бер сәгать төнәтегез. Моны ашарга ярты сәгать кала, җылытып, көнгә өч тапкыр яртышар стакан эчегез.

Коры ютәлдән
2 аш кашыгы кипкән кабыкка 1 стакан аракы салып, караңгы урында бер атна төнәтегез. Тиешле вакыт узганнан соң, сөзеп, суга 20 тамчы тамызып, ашар алдыннан көнгә өч тапкыр эчегез. Мандарин кабыгы составындагы эфир майлары нык файдалы.

Салкын тигәндә
Бер уч кипкән мандарин кабыгына кайнар су коеп, тар борынлы савытка салып, 10 минут шуның парын иснәгез. Әлеге процедурадан соң бер сәгать урамга чыгарга ярамый. Фитонцидка бай мандарин пары инфекцияләрне тиз арада куа.

Аяк табаны гөмбәчегеннән
Мандарин кабыгы белән тырнакларны һәм бармак араларын көнгә ике тапкыр ышкырга кирәк.

Хәлсезлек һәм йокысызлыктан
Мандарин кабыгын вак-вак бүлгәләп, пакетка салыгыз да 15 минут иснәгез. Ул баш авыртудан да коткара. Цитруслылар исе һәм эфир майлары арыганлыкны ала, стресстан коткара, тынычландыра һәм йоклап китәргә булыша.

чыганак