Чирмешән районында караклар үләт базындагы төсле калайларга кызыкканнар
Лашман авылы янәшәсендәге биотермик чокыр – үләт базы территориясеннән төсле калай – профлистлар “аякланган”. Әлеге угрылык факты уңаеннан тикшерү бара.
Гомумән, 24-30 июнь көннәрендә район полиция бүлегенең дежур частенда 35 хәбәр кабул иткәннәр. Бу чорда бер җинаять эше кузгатылган. Полиция участок уполномоченныйлары 18 административ беркетмә төзегәннәр.
Район юлларында бер атнада 2 юл-транспорт һәлакәте булган, шуларның берсендә имгәнүче бар. Юл хәрәкәте кагыйдәләрен бозуның 72 очрагы ачыкланган.
Чирмешәндә яшәүче хатын-кыз үзенә карата хулиганлык гамәлләре кылган элеккеге ирен административ җаваплылыкка тартуны сорый. Район үзәгендә яшәүче тагын бер хатын-кыз иртәнге сәгатьләрдә аның тынычлыгын бозган билгесез кешеләрдән зарланган. Исерекләр бу ханымның йорт коймасына шакыганнар һәм сүгенгәннәр.
Әлеге мәгълүматлар Россия Эчке эшләр министрлыгының Чирмешән районы буенча бүлеге штабыннан алынды.
фото: автор
Следите за самым важным и интересным в Telegram-каналеТатмедиа
Нет комментариев