Чирмешәндәге төзелүче икенче мәчет нигезен Урал ташы белән тышлаячаклар

Чирмешәннең Амур ягында төзелүче мәчетнең төп залында түбә ясыйлар, идәнгә измә җәяләр. Подвал өлешендәге ир-атлар һәм хатын-кызлар өчен аерым тәхарәтханәдә дә эш күп калмаган.

Җылылык, су челтәрләре сузу буенча да проблемалар юк, тик тышкы якта нигезне җылыту, әле генә Уралдан ук кайтарылган яхшы таш белән тышлау өчен һава торышы мөмкинлек бирми.

Әмир егетләре - бертуган Әгъләмовлар төзетүче мәчет манараларына айларны да монтажлап җыясы гына калган. Һава торышы җайланса, койма да бастыра башламакчылар.