Югары Чегодай балыкчысы бу көннәрдә кармакны тирәнгә салмый

Сергей Барсуков белән Югары Чегодай авылы үзәгендәге буа ярында, балык чирттереп утырган вакытында гапләшеп алдык.

-Йортыбыз моннан ерак түгел. Вакыт булганда шунда килеп кармак салам, ике-өч сәгать утырып кайтам шулай, - ди һәвәскәр балыкчы.

Ул бүген дә монда иртәнге алтыдан, сәгать тугызларга уңышы – ярты чиләк чамасы эреле-ваклы кәрәкә (карась).

-Монда бүтән балык юк, аларны суалчанга тотам, кукурузга да эләктерергә мөмкин, - ди Сергей Федорович.

Ул тәҗрибәле балыкчы икән. Гадәттә, бу шөгыленә боз китүгә керешә.

-Хәзер саерак, су өсте җылына төшкән урыннарда яхшырак чиртә. Шуңа күрә кармакны бик тирәнгә салмыйм, 25-35 сантиметрга гына. Балык тоту – азарт, күңелгә рәхәтлек, ял, шул ук вакытта ризык юллау да, - диде  саубуллашканда Сергей агай.

автор фотолары