“Эш сорауның гаебе юк”,- ди Виталий Логинов

Яшереп тормыйм, әүвәл Әккәрәйдәге танышларымнан, ниндиерәк кеше соң ул, дип сораштым. Уңай характеристика бирделәр. Аннан соң инде егетнең үзенә шалтыраттым.

-Әккәрәйдә туып үстем. Мәктәпне тәмамлагач, Лениногорскидагы политехника көллиятендә укыдым. Һөнәрем буенча тракторчы – машинист, машина йөртү таныклыгым бар,  - ди Виталий. – Төрле җирләрдә эшләргә туры килде. Себер якларында да йөреп кайттым, Мәскәүдә дә булдым. Нигездә, төзелешләрдә хезмәт куйдым. Белмәгән эшем булса, өйрәнергә тырыштым. Минемчә, ир-егет бөтен нәрсәне  белергә тиеш. Бүген әти-әни янында авылда торам. Анда-монда  урнашып карадым, эш бар оешмаларда   хезмәт хакы  түләмиләр яисә ул бик түбән. Эшсез дә торып булмый бит.

-Белдерүләрең буенча шалтыратучылар бармы соң?

-Булып тора. Авылда эш бетми бит. Кемгәдер сүтәргә, башкасына – төзергә. Бакча эшләренә, мебель җыярга да  чакыралар. Мин бер эштән дә курыкмыйм. Эш күләме зуррак булса, аны берничә кеше, бригада белән башкарабыз. Әле күрше Яңа Чишмә районына да чакырганнары бар.

-Интернетта сиңа комментарийлар да күп язалар, “тозлап, борычлап”та җибәрәләр. Аларны укыйсыңмы, ачуың килмиме?

-Юк, мин аларга игътибар бирмим. Бәлки кемдер көнләшәдер, башкасы – көндәш  булырга мөмкин. Эш сорауның ояты юк, дип уйлыйм.

Автор фотосы