Чирмешәндә яшәүче сугыш ветераны Александр Чупахинга Президент бүләген тапшырдылар

Бөек Җиңүнең 72 еллыгын каршылаган көннәрдә районның Бөек Ватан сугышы ветераннарына Татарстан Республикасы Президентының бүләкләрен тапшырдылар.

Район башлыгы Фердинат Дәүләтшин 92 яшен тутырган Александр Чупахинга Президент күчтәнәчләрен һәм шәхсән үзенең бүләкләрен өенә илтеп бирде. Сугыш михнәтләрен күп күргән, сугыштан соң да 42 ел колхозда бухгалтер булып эшләгән ветеран мондый хөрмәтләүгә бик лаек.

Чирмешәндә Александар Васильевич карчыгы белән дәүләтебез төзеп биргән җайлы, бөтен уңайлыклары да булган җыйнак йортта гомер кичерә. Үз аякларында йөреп, кирәк җиренә үзе бара. Кунаклар килүенә бик шатланды. Ветеранга район башлыгы белән чәй табыны артында истәлекләрне яңартырга да җай чыкты. Александр Чупахин Җиңү бәйрәмен гел көтеп ала, аңа бәйрәм көнне ерак йөрисе түгел, Җиңү паркы аларның өй каршында гына.