Эш урыннары да бар, эшсезләр дә күп

Район мәшгульлек үзәгендә 155 кеше эшсез буларак исәптә тора, шул ук вакытта үзәк 51 эш урыны тәкъдим итә.

Эш юк дип тә булмый, район үзәгендәге төрле оешмаларга, авыл хуҗалыгы предприятиеләренә бүгеннән белгечләр дә, эшчеләр дә кирәк.

Агымдагы елның җиде аенда үзәккә 673 кеше мөрәҗәгать иткән, 309сы эш эзләүче буларак исәпкә куелган, 213 мөрәҗәгать итүче эшсез дип табылган һәм аларга эшсезлек буенча пособие билгеләнгән; 13се - кыскартылу сәбәпле эшсез калучылар, шуларның 3се быел гына кыскартылуга эләккән.

Җиде айда 80 яшүсмер вакытлыча эшкә урнаштырылган. 51 яшүсмер эшен тәмамласа, 29сы әле районның төрле оешмаларында эшләүләрен дәвам итә. 39 эшсез җәмәгать эшенә җибәрелгән.

Быел эш урыннары тәкъдим итү буенча үткәрелгән ярминкәдә 35 кеше катнашкан, 6 кеше эшкә урнаштырылган.