Чирмешән урманчыларының балаларына бүләкләр җибәргәннәр

Чирмешәннән Руслан һәм Елена Талиповлар өч бала үстерәләр. Быел уртанчылары – Риназ беренче сыйныфка барачак. Әлбәттә, күп балалы әлеге гаиләгә республика Урман хуҗалыгы министрлыгының профсоюз комитеты җибәргән бүләкләр бик ярап куйган.

-Дәфтәрләр, ручка, карандашлар, буяулар, пумалалар, төсле кәгазьләр, пластилин, хәтта дымлы салфеткаларга кадәр куйганнар. Ничек сөенмисең инде моңа?! Дәүләт ике балага биргән 20 мең сумга байтак әйбер, мәктәпкә барырга кием-салым алып өлгергән идек, әле тагын аласы бар. Шуңа күрә бүләк өчен бик рәхмәт, - ди урман хуҗалыгында эшләүче  Елена Талипова.

Быел район урманчыларының өч баласы укырга керәчәк. Риназ кебек,  Чирмешәннән Иван Андреев,  Казанкадан Снежана Юнусова да мондый кирәк-яракларга ия. Аларга бүләкләрне Чирмешән урманчылыгының профсоюз комитеты рәисе Марс Рәхимҗанов тапшырды.

-Яхшы укыгыз, тәртипле булыгыз,  - диде ул.

Сабыйлар Чирмешән урманчылыгы территориясендәге “Урман бүләкләре” кибетен һәм “Лесовичок” питомнигын карадылар, яхшы укырга һәм хәтта урманчы булырга вәгъдә иттеләр.

фото: Регина Газизова