Чирмешән районында балалар бакчалары чыгарылыш кичәләренә әзерләнә

Чирмешән районында мәктәп яшенә җиткән 130 сабый бакча белән хушлашачак.

Май ахырында балалар бакчаларында да чыгарылыш кичәләре башланып китәчәк. Быел районда 130 сабый бакча белән хушлаша, ягъни алар 1 сентябрьдән парта артына утырачаклар.

Иң зур чыгарылыш "Ромашка" балалар бакчасында - аннан - 19, "Чишмәкәй"дән - 18, Лашман балалар бакчасыннан - 14, ә "Каенкай" һәм "Ландыш"тан 12шәр сабый мәктәпкә китәчәк. Кармыш авылындагы балалар бакчасында быел чыгарылыш кичәсе булмый, Шешминка, Түбән Кармалка, Югары Кармалка, Утыз Имән мәктәпләренең мәктәпкәчә төркемнәрендә тәрбияләнүчеләр дә юк икән. Ә Әмир, Ульяновка, Иске Үтәмеш, Күтәмә авыллары балалар бакчаларында бары берәр сабыйга гына "соңгы кыңгырау" чыңлаячак.

Яңа балалар бакчалары төзелү белән сабыйларны бакчага урнаштыру проблемасы кимесә дә, ул бөтенләй бетмәде.

-Иске Элмәле балалар бакчасы 16 балага исәпләнгән, бүгенге көндә биредә 14 сабый бакчага урын көтә, шуларның 4се 3 яшькә кадәрле, - ди район мәгариф бүлегенең мәктәпкәчә белем бирү методисты Людмила Мәсәллимова. - Быел бу бакчадан 6 бала мәктәпкә китә, шуннан соң да урын проблемасы тулысынча хәл ителми әле.

Чирмешәннең "Ландыш" бакчасында - 6, "Каенкай"да 15 балага урын җитми икән. Шул ук вакытта "Әкият" балалар бакчасында төрле яшьтәге 20 сабыйга урын булса да, ата-аналар балаларын үзләренә җайлы, якын бакчада тәрбияләргә телиләр, чират көтәләр.