Чирмешәндәге инвалидлар оешмасы үз кунакларын кайнар мантыйлар белән дә сыйлады

Бакчаларда үстерелгән җиләк-җимеш, яшелчәләрдән ясалган, пешерелгән ризыклар әүвәл “Көзге нигъмәтләр“ дип аталган күргәзмәдә урын алса, соңрак бу тәм-томнарның бер өлеше табынга да күчте. Шөкер, быелгы көз сөендерерлек, уңышка бай ул.

-Бәрәңге уртачарак чыкса да, башкалары нык уңды. Кемдәдер чия булмаса, бездә, нишләптер,  “ишелде” бу җимеш, Дүрт-биш куактан 32 чиләк слива да  җыеп алдык, кыяр котырды, кишер, помидор әллә никадәр, - диде чарага Туймәттән коймак пешереп килгән Рәсимә Хәйруллина.

Бөтен бәйрәм берьюлы дигәндәй, кунакка чакырылган өлкәннәр арасында ветеран  укытучылар да бар иде, алар бер-берсен һөнәри бәйрәмнәре белән котлады. Өлкәннәр көне дә күрешергә бер форсат. Ә урамда матур, сихри көз. Бакчаларда эшләрнең беткән чоры. Вакыт бар: рәхәтләнеп сөйләш, аралаш.

-Мин, гомумән, көзне яратам. Беренчедән,  19 октябрьдә туган көнем, икенчедән, табигатьнең, агач яфракларының төрле төсләргә кергән гаҗәеп вакыты бу, - дип шатлыгын уртаклашты  Күтәмәдән Александр Семайкин.

Һәр авылдан диярлек берәр вәкил булган бәйрәмдә кунаклар өчен мул табын көйләделәр.

-Лашманнан Альфрид Хәйрисламов җитәкчелегендәге “Чирмешән” кооперативы кызлары өлкәннәргә дип мантыйларга кадәр пешереп җибәргәннәр, пилмәннәр ясаганнар. Шәхси эшмәкәр Роман Бадикянга, “Идел-Ойл” нефтьчеләренә дә зур рәхмәт, - диде район инвалидлар оешмасы рәисе Мәдинә Талипова.

Юл куркынычсызлыгы фондының райондагы вәкиле  Алинә Филиппованың бүләге - караңгыда яктылык кайтаргыч жилетлар да өлкәннәребезгә бик ярап куяр.

"Безнең Чирмешән"нең МАХ мессенджеренда иң мөһим, кызыклы вакыйгаларны күзәтегез.