“Сөлчә” җәмгыятендә язгы чәчүне булачак арпа кырларыннан башладылар. Лашман белән Яңа Элмәле авыллары арасында Ком базы янындагы участокта шактый техника эшли.
-3 нче көн чәчәбез, җирләр яхшы өлгерде, дым бар вакытта орлыкларны туфракка төртү отышлы, - ди чәчкеч таккан МТЗ-80 тракторын йөртүче Семен Васюткин.
Механизаторның тракторы – күпне күргән техника, үзе әйтмешли, “картлачка” 40 ел ук. Карап, ремонтлап җибәргәч, сынатмый, ди үзе. Иртәнге 6дан кичке караңгыга кадәр эшләргә ышанычлы техника кирәк шул.
-Эшебез җайлы гына бара, ягулык белән өзеклек юк. Көнгә ике тапкыр: төш вакытында, кичен кырга китереп ашаталар. Кичә менә төш вакытында токмачлы аш белән итле карабодай, кичен итле изгән бәрәңге белән сыйладылар, - ди Семен Александрович.
Без сөйләшкән арада “сеяльщик” Владимир Биктимиров чәчкеч савытларын орлык белән тутырып куйды. “Симәнәне” ГАЗ-53 автомашинасы белән Семен Скворцов ташып тора.
-Минем дә машинам яңа түгел, 1987 елгы. Алай да егетләргә бөртекне китереп өлгереп торам. 3әр тонна төяп, Яңа Элмәледәге складтан көненә 3 рейс ясыйм, - ди күп еллар машина йөртүче булып эшләүче Семен Гурьевич.
“Сөлчә” җәмгыяте җитәкчесе Хәмзә Хамматов сүзләренчә, бүген әлеге хуҗалык кырларында 11 берәмлек техника “җигелгән”. Кырда эшләүче 18 кешегә аш-су әзерләнә.
Район авыл хуҗалыгы һәм азык-төлек идарәсеннән 22 апрельгә алынган мәгълүматлар буенча, район хуҗалыкларында дым каплату эшләре 38697 гектар мәйданда башкарылган, тиешленең 84 проценты. Байтак хуҗалыкларда бөртеклеләр чәчүгә керештеләр.
Марат Гомәров фотолары
"Безнең Чирмешән"нең МАХ мессенджеренда иң мөһим, кызыклы вакыйгаларны күзәтегез.
Нет комментариев