Чирмешән районында беренче кар аварияләргә сәбәпче булды

-Синоптикларның  кисәтүләренә карамастан, кайбер якташларыбыз машиналарында әле һаман җәйге резина белән йөрүләрен дәвам итәләр, - ди районның ЮХИДИ бүлекчәсе начальнигы Иван Мясников. – Бүген район үзәгендә Чирмешән кешесе, Кече Чегодайдан ерак түгел, машинасы белән юл кырыена төшеп китә, юл билгесенә килеп бәрелә. Транспорт иясе транспорт чарасының көпчәкләрен кышкыга алмаштырмаган. Кышкы юлда сак йөрмәсәң,  кайбер чакта тырнаклы көпчәкләр дә ярдәм итмәскә мөмкин. Акъяр –Чирмешән юлында, әйтик, ике җиңел автомобиль кара-каршы юлдан барганда, бер –берсенең машиналарын эләктерәләр, көзгеләре ватыла.

Бәхеткә, әлеге аварияләрдә кешеләргә зыян килмәгән, ә инде машиналарны  ремонтлатып та булыр. Шулай да, ЮХИДИ хезмәткәрләре юлларда игътибарлы булырга, ашыкмаска киңәш итәләр.

фото: архив