Бәлага таручыларга ярдәм күрсәтелде

11 декабрь төнендә, төгәлрәге 00 сәгать 35 минутта, Чирмешән бердәм диспетчерлык пультына хәбәр керә - Әмир авылы янында Самарадан Пермьгә кайтучы "Мерседес Бенс - 0404" автобусы ватылган, төн уртасында салкын автобуста өшеп утыручы 51 пассажир ярдәмгә мохтаҗ.

Районыбызның төрле хезмәтләре, төгәлрәге, 135-нче янгын часте, "Чирмешән АТП", "Татавтодор", ЮХИДИ һәм район җитәкчелеге бәлага таручыларга ярдәмгә ашыга. Бер сәгать эчендә 51 пассажир "Юбилейный" Боз сарае кунакханәсенә урнаштырылып, кайнар аш белән тәэмин ителгән. Икенче көнне аларны Пермьнән бүтән автобус килеп ала, кышкы юлда күңелсез маҗараларга очраган пассажирлар исән - имин кайтып җиткәннәр.