Диспансеризация узган чирмешәнлеләрнең алтысында яман шеш табылган

Профилактик тикшерү узарга тиешле 1201 райондашыбызның 684е бу эшне озакка сузмыйча башкарып куйган.

Быелның җиде аена мәгълүматларны район үзәк больницасыннан бирделәр.

-Диспансеризация һәм профилактик тикшеренү узган райондашларыбыз арасыннан 582сенең сәламәтлеге беренче төркемгә керә, ягъни алар – сәламәт. 719 кешенең сәламәтлеге – икенче төркем, 2278е – өченче А төркем, 460ы өченче Б төркем булуы ачыкланды, - ди район үзәк больницасы баш табибы Лилия Мортазина. – Райондашларыбыз чакырганны көтмәсеннәр иде, авыру “ишек шакыганчы” тикшеренү узу авыруларны вакытында дәваларга һәм кисәтергә ярдәм итә. Әйтик, маммография узган 1594 хатын-кызның 160ында патология ачыкланды.

Диспансеризация узгандагы тикшерүләр нәтиҗәсендә алты кешедә яман шеш ачыкланган. Ике кешедә – шикәр диабеты, дүрт кешедә – гастрит, ашкайнату органнарында – 8, кан әйләнеше органнарында – 65, тын юлларында – 5, эчәклекләрдә – 4, простата бизендә – 14 кешедә чирләр табылган, тагын 65 якташыбызда башка төрле авырулар ачыкланган.