Чирмешән эшмәкәре батыр якташыбыз истәлегенә куелган стеланы яңартты

-Хезмәттәшебезнең батырлыгы мәңгелек. Без аны онытмыйбыз. Мирсәетнең истәлеген саклаучы әлеге стеланы да даими карап торабыз. Быел безгә бу эштә Ульяновка авылы эшмәкәре Петр Проковьев үз ярдәмен тәкъдим итте, - диде Россия ЭЭМның Чирмешән районы буенча бүлегенең ветераннар Советы рәисе Наилә Мәссарова. – Ул стеланы буяп, яңартып куйды. Мирсәет Мирсәяф улының һәлак булган урынында куелган чардуган да яңа төс алды. Петр Захарович аны да үз мастерскоена алып кайтып, чистартып, махсус, чыдам буяу белән буяды. Бүлек каршындагы эскәмияләрне дә яңартып куйды. Якташ эшмәкәребезгә хәйриячелек кысаларында башкарган бу изге эшләре өчен олы рәхмәтебезне җиткерәбез. Кылган игелекләре үзенә дә меңе белән әйләнеп кайтсын.

Хезмәттәшләре Мирсәетнең әти-әниләрен дә онытмыйлар, хәлләрен белеп, ярдәм итеп торалар.

2009 елның 23 декабрендә, кораллы җинаятчене тоткарлаганда, граната шартлап, 40 яшьлек милиция майоры Мирсәет Кәбировның йөрәге тибүдән туктады. Вафатыннан соң, аны Батырлык ордены белән бүләкләделәр.