Су ник җитми?

Яз җиткәч, көннәр кыздыра башлау белән, район үзәге Чирмешәндәге кайбер урамнарда чиста суга кытлыктан интегәләр. Моңа, билгеле, бу чорда су куллану күләменең нык артуы сәбәпче.

"Чирмешән районы коммуналь челтәрләре" җәмгыяте җитәкчесе Илнар Минһаҗев су белән тәэмин итеп җиткермәү проблемасын болай аңлата: "Скважиналарда насослар бертуктаусыз эшләп тора, әмма соңгы елларда Чирмешәннең яңа, төньяк микрорайонында яңа өйләр төзеп керүчеләр күп булды, монда халык саны да арта бара. Су линиясенә яңа йортлар тоташа. Су җитмәүнең бер сәбәбе шул. Аннан соң инде, елдагыча, кайбер чирмешәнлеләр бакчаларына чамадан тыш су агызалар. Шуңа да башкаларның краннарына су килеп җитми".