Утыз Имәндә берәүләр авылдашларын талаганнар

Нык кәеф-сафа корганнан соң, урта яшьләрдәге әлеге ир-ат белән хатын-кыз бу көнне махмырдан интегәләр. Акча юк бит инде, аны таныш авылдашларыннан бурычка алырга булганнар. Авылдашының бу гозерне кире кагу ихтималын истә тотып, алар көч кулланырга килешәләр. Пенсия алды яшендәге хатын-кыз үзләрен танымасын өчен, йөзләренә башлык тарттыралар, якаларын күтәрәләр, тавышларын үзгәртеп, үтерү белән яныйлар. Ир-ат хатын-кызның башына йодрыгы белән берничә тапкыр суга да. Курыккан хуҗабикә үз курткасы кесәсендә 500 сум акчасы булуын әйтә. Талаучылар шуны алалар һәм “баш төзәтергә” китәләр, нәтиҗәдә суд эскәмиясенә эләгәләр.

-Әлеге ир-ат белән хатын-кыз элек хөкем ителмәгәннәр, канәгатьләнерлек характерланалар, - ди район прокуроры урынбасары Айназ Газизов. -Шуларны һәм башка хәлләрне искә алып, хөкем ителүчеләргә, 2 ел сынау срогы белән, 4 елга ирекләреннән мәхрүм итү җәзасы чыгарылды. Карар әлегә үз көченә кермәгән.

фото: архив