Җинаятьләрне вакытында кисәтик

Агымдагы елның өч аенда районда яшүсмерләр тарафыннан кылынган ике җинаять теркәлгән.

Шул чорда 13 яшьтән 17 яшькәчә 12 яшүсмер Россия ЭЭМның "Чирмешән" муниципальара бүлегендә яшүсмерләр эшләрен профилактикалау бүлекчәсендә исәптә тора. Беренче кварталда 3 яшүсмер исәпкә куелган, 3се исәптән төшерелгән. Аларның 4се - мәктәп, 8се - техникум, училище, колледж укучылары. Балигъ булмаганнар тарафыннан хокук бозуларны профилактикалау, аларның хокукларын яклау буенча прокуратура каршындагы эшче группаның чираттагы утырышында да сүз шул хакта барды.

Яшүсмерләрнең җинаять кылуының төп сәбәбе - гаиләләрендәге начар шартлар. Җинаятьләрне булдырмый калу максатында полиция хезмәткәрләре профилактик эшләр үткәрә. Быел ике уңышсыз гаилә профилактик исәпкә куелган, ә барлыгы шундый 9 гаилә исәптә тора.

Утырышта уңышсыз гаиләләрне һәм аларда тәрбияләнүче балаларны вакытында ачыклау һәм профилактик эш үткәрү максатында авыл җирлекләре башлыклары һәм хезмәткәрләре белән тыгыз элемтәдә торып эшләргә кирәклеге дә билгеләп үтелде.