Чумачкадан да матур урын юктыр

Алар таныш авылдашы белән сөйләшеп торалар иде.

-Нишләп утырып ял итмисез? – дим.

-Утырып торырга вакыт юк шул.

-Бакча эше, чүп котырадыр?

-Анысы да бар.

-Сездә дә яңгыр тансыкмы?

-Әйе, узган атнада Чирмешәндә булган яңгыр да безне урап үтте, тамчылап кына сибәләде. Апрельдә, майда, июньдә дә яңгыр күрмәдек.

-Су белән ничек?

-Үзебезнең кое бар, инде алтмыш еллап суны насос кабызып суыртабыз. Хәзер авыл эчендә торбалар салдылар, су озакламый башнядан агып киләчәк.

-Чумачка тирәсендә җиләклекләр күп.

-Быел юк шул, энем, җир коры бит, үткән елларда аны күп җыйдык.

-Мал-туарыгыз бармы, Тәслия апа?

-Тавык та асрамыйм. Олыгаелды, миңа 84 яшь тулды. Балалар читтә, үзем генә торам. Картым Шәйхелислам исән чагында сыер да, сарыклар да тоттык.

-Элек бит азыгын әзерләү дә мәшәкать иде.

-Барын да кул көче белән башкардык. Колхозда да бушка эшләттеләр диярлек, башкалар турында әйтмим, мине бүләк биреп сөендермәделәр.

-Еракка чыгып киткәнегез булдымы?

-Чирмешәннән еракка бармадык. Әлмәттә булдым икән, анда бер кызым яши.

-Барыбер Чумачкадан да матур урын юк бугай?

-Дөрес, бик матур җирдә урнашкан безнең авыл, моннан да яхшы җир тапмассың.

-Чирмешәннән ераграк булгач, кибеттә товар азрактыр?

-Бөтен нәрсә бар кибетебездә. Фельдшерыбыз да бик булдыклы, дөньяда бер. Мәчет, клуб та гел ачык. Яшьләр генә азрак.

-Иң зур теләгең нинди, Тәслия апа?

-Исәнлек кирәк, башкасы икенче планда. Бүгенге тормышка зарланырлык түгел.

Кадыйр Гомәров фотолары 

"Безнең Чирмешән"нең МАХ мессенджеренда иң мөһим, кызыклы вакыйгаларны күзәтегез.