Чирмешәндә милиция майоры Мирсәет Кәбировны искә алдылар

Милиция майоры Мирсәет Кәбиров 2009 нчы елның 23 декабрендә кораллы җинаятьчене тоткарлаганда һәлак була.

Полиция хезмәткәрләре инде ике кешене яраларга өлгергән җинаятьчене Чирмешән районы чигендә куып җитәләр. Алар таләбе буенча, качып баручы ир-ат пистолетын якка ташлый һәм җиргә ята. Милиционерлар аңа якын килгәч, үз астында граната шартлата. Әлеге  граната кыйпылчыклары Мирсәетнең йөрәген һәм үпкәсен яралый. Ул шунда ук һәлак булган. Граната шартлаткан җинаятьче үзе дә үлә.

Туган авылы Кызыл Ярда җирләнгән батыр якташыбызның ике кызы ятимә, ә хатыны Тәгъзимә тол калды.

Район мәдәният йортында узган чарада 12 ел элек булган вакыйганы кабат искә алдылар.

Һәлак булганнан соң "Батырлык ордены" белән бүләкләнгән якташыбыз истәлегенә оештырылган чарада Мирсәет хакында ролик караганда күпләрнең күзләре яшьләнде.

Очрашуга Мирсәетнең әнисе Фидания апаны һәм тол калган хатыны Тәгъзимәне дә дәшкәннәр иде. Кызганыч, әтисе Мирсәяф абый, авыру сәбәпле, район үзәгенә килә алмаган.

- Форсаттан файдаланып, Мирсәетнең хезмәттәшләренә, район полиция  бүлекчәсе, ЮХИДИ идарәсе җитәкчеләренә, аны шулай искә алулары, безгә гел ярдәм итеп торулары өчен  зур рәхмәтемне белдерәм, - диде Тәгъзимә Муса кызы.

Район башкарма комитеты җитәкчесе урынбасары Илфат Шәйдуллин, ЮХИДИ район бүлекчәсе начальнигы Рәмис Шәкүров, полициянең ветераннар советы җитәкчесе Наилә Мәссарова һәм башкалар бүген Мирсәет Кәбировны искә алып сөйләделәр, 10 декабрьдә туган көне булган Фидания апага һәм Тәгъзимәгә чәчәкләр һәм бүләкләр тапшырдылар.

Марат Кәбиров фотолары