Чирмешән котельныйлары ягулык сезонына әзер

- Җәйге чорда авыллардагы һәм район үзәгендәге котельныйларга чираттагы ремонт ясадык: мичләр чистартылды, санагычлар һәм сигнализаторларны тикшертеп урнаштырдык. Барлык насослар, приборлар төзек, әлегә опрессовка бара, - диде предприятие директоры урынбасары Михаил Арютин. – Чирмешәннең үзәк котельныеннан Совет урамына кадәр һәм район мәдәният йорты тирәсендә, барлыгы 400 метр озынлыкта, җылылык трассасын алыштырдык.

Михаил Иванович әйтүенчә, район башкарма комитетыннан җылыту сезонын башлауга рөхсәт булу белән, алар җылылык җибәрергә әзер. Гадәттә, уртача тәүлек температура рәттән өч көн дәвамында плюс 8 градустан артмаса, барлык объектларга да җылылык җибәрә башлыйлар.