Чирмешән табибы иммунитетны да ныгытырга куша

-Зилә Мисбаховна, нигә ОРВИ һәм грипп белән кабат-кабат авырыйбыз?

- Вируслар, бигрәк тә грипп вируслары, мәкерле - алар даими рәвештә үз структураларын үзгәртә. Организм аны танымый, саклау да эшләми. Нәкъ менә шуңа күрә, узган сезонда авырсак та, кеше аны яңадан йоктырырга мөмкин.

- Ул аеруча кемнәр өчен куркыныч?

- Грипп бигрәк тә сабыйлар һәм өлкән яшьтәгеләр, шулай ук ВИЧ-инфекциялеләр, каты чирләүчеләр өчен аяныч.

- Гриппны йоктырмас өчен...

- Гриппка каршы прививка ясату – авырудан саклану өчен беренче адым. Аның өчен иң кулай вакыт – октябрь - ноябрь айлары. Вакцина составы ел саен яңартыла.

-Тагын ничек сакланырга?

1. Кулларыгызны ешрак юыгыз. Вируслар берничә сәгать яши ала. Урамнан, транспорттан төшкәч, ишек тоткалары тоткач, кулларыгызны сабын белән ешрак юыгыз. Андый мөмкинлек булмаса, дезинфекцияләүче салфеткалар яки антисептиклар кулланыгыз. Юылмаган кулларыгыз белән битегезгә, борыныгызга һәм күзләрегезгә кагылмагыз.

2. Дистанцияне һәм респиратор этикетны саклагыз. Йөткерүче һәм төчкерүче кешеләрдән читтәрәк торыгыз. Җәмәгать урыннарында һәм транспортта саклагыч маска киегез. Төчкергәндә һәм йөткергәндә авызыгызны бер тапкыр кулланыла торган салфетка белән каплагыз, аны ташлагыз. Мөмкин булса, кул биреп исәнләшүне һәм кочаклауны чикләгез.

3. Организмны ныгытыгыз. Сәламәт яшәү рәвеше - нык иммунитет нигезе. Туйганчы йоклау, витаминнарга һәм аксымнарга бай ризыклар белән туклану, физик активлык - болар барысы да организмга тонуста булырга һәм инфекцияләргә яхшырак каршы торырга ярдәм итә

- Маска дигәннән, аларның файдасы булсын өчен, аларны ничек кияргә?

- Битлекнең - дөрес файдаланганда гына нәтиҗәсе була. Ул авызны да, борынны да каплап, биткә тыгыз ятарга тиеш. Аны 2 сәгать саен яки иртәрәк тә алыштырырга кирәк. Бер тапкыр кулланыла торган битлекне кабат кулланырга ярамый! Аны салганда, тышкы өслеккә кагылмаска тырышыгыз, ә салганнан соң шунда ук кулларыгызны юыгыз. Исегездә тотыгыз: битлек ачык һавада кирәкми, аның максаты – кешеләр күп җыела торган урыннарда саклау.

- Шулай да грипп симптомнары барлыкка килсә, ни эшләргә?

- Беренче һәм иң мөһим кагыйдә - өйдә калу һәм кичекмәстән табиб чакырту. Гриппны аяк өстендә үткәрергә ярамый.  Вакытында табибка күренү һәм авыруны мөмкин кадәр иртәрәк дәвалый башлау (авырый башлаганнан соң беренче 48 сәгать) грипптан соң өзлегүне (бронхит, пневмония, отит, менингит) булдырмаячак.

- Әгәр гаилә әгъзаларының берәрсе авырып китсә?

- Авыруга аерым бүлмә биреп, аны изоляцияләргә тырышырга кирәк. Әгәр бу мөмкин булмаса, 1 метр араны саклагыз. Бүлмәне ешрак җилләтегез һәм дезинфекцияләү чаралары белән дымлы җыештырыгыз. Авыруның савыт-сабасы һәм сөлгеләре индивидуаль булырга тиеш. Авыруны маска кулланып, карау яхшырак.

 Сәламәт булыгыз һәм үзегезне саклагыз! Исегездә тотыгыз, салкын тию сезонында иң яхшы стратегия – ул акыллы профилактика һәм үз сәламәтлегегезгә һәм әйләнә-тирәдәгеләрнең сәламәтлегенә җаваплы мөнәсәбәт.

Рәсем ясалма фәһем ярдәмендә башкарылды.