Төп бүләкне – генераторны Югары Кәминкә авылында яшәүче Шәмсетдиновлар гаиләсе отты

Алар бу зур бүләкне отышларның төп иганәчесе - район башлыгы Рамил Айбатовның кулыннан алдылар.

-Әлеге генератор сезгә файда китерсен, озак хезмәт итсен, - диде Рамил Тәлгать улы.

Сүз уңаеннан, район башлыгы инде берничә ел рәттән редакциягә кыйммәтле призлар алуда булыша.

-Көтелмәгән бүләк булды бу, бик зур рәхмәт сезгә, отармын дип һич уйламаган идем, - диде район үзәк больницасында шәфкать туташы булып эшләүче Алия Илшат кызы. – Район газетасына ел да язылабыз. Бик яратып укыйбыз. Бу акциядә өченче ел рәттән катнашам, әлегә кадәр бәхет елмаймады.

-Генератор алырга исәпләп йөри идем, безгә ул бик кирәк. Авылдан читтәрәк умарталыгыбыз бар. Менә шунда инде генератор алмаштыргысыз әйбер, аеруча бал аертканда, - дип рәхмәтен белдерде Алиянең тормыш иптәше Ренат.

Шәмсетдиновлар дүрт бала үстерәләр, быел өлкән кызлары 11 нче сыйныфка бара, төпчекләре беренчегә керә.

Алар төп йортта әти-әниләре Ясәви абый һәм Асия апа белән бергә яшиләр. Өч буын вәкилләре гөрләшеп, дус-тату булып тормыш итәләр.

Ясәви Гафур улы да районда танылган кеше, ул берничә китап авторы. Әле шушы көннәрдә генә аның тагын бер китабы – “Ибрай Каргалы: дәверләр һәм кешеләр” дөнья күрде. Аның бер экземплярын ул район башлыгына бүләк итте.