Лагеркадан Мироновларның чәчәк түтәлләрен читән коймалар саклый

Алар алты ел элек туган авылларына, Ирина Алексеевнаның төп йортына кайтып урнашканнар.

-43 ел Самара өлкәсендә, Тольятти шәһәрендә, яшәдек. Тик үземне авылдан китмәгән дә кебек хис итәм. Әти-әни олы яшьтә иде, аларга ярдәм итәргә, карарга кирәк булгач, атна саен диярлек кайтып йөрдек, - ди хуҗабикә.

Якташыбыз 17 ел дуңгызчылык комплексында эшләгән, күп еллар “Автоваз”да да хезмәт куйган. Ире Александр Викторович тракторчы-механизатор, экскаваторчы булып эшләгән. Ике уллары да Тольяттида төпләнеп, гаилә корганнар. Тик, ни кызганыч, Мироновларга бала хәсрәте дә күрергә туры килә: матур гына яшәп торганда олы уллары вафат була. Хәзер әби-бабайны дүрт оныклары сөендерә.

-Шәһәр җирендәге көйләнгән, өйрәнгән тормышыгызны ташлап кайту авыр булмадымы? – дигән сорауга алар бертавыштан:

-Читтә яшәсәк тә, туган җир һәрвакыт үзенә тартты, - диделәр.

Хуҗаларның уңганлыгы капка төбеннән үк күренеп тора: бөтен җирдә чисталык, пөхтәлек. Ирина Алексеевна чәчәкләр үстерергә ярата икән. Шул уңайдан аның бер үзенчәлекле шөгыле ачыкланды: клумбаларына кош-корт тимәсен дип, аларның тирәләрен читән койма үреп аерып куйган.

-Без үскәндә хәзерге кебек заманча төзелеш материаллары юк иде, авыл җирендә барысының да диярлек коймалары шулай үреп ясалган иде, - дип искә алды ул. – Шуларны хәтерләп үзем дә читән коймалар ясап куям, матур да килешле дә тора.

Александр Викторовичның гаражына керсәң дә таң калырлык: һәр эш коралы гына түгел, шөрепкә кадәр – барысы да үз урынында.

-Авыл җирендә дә үзеңә шөгылен дә, мавыгуын да табып була. Бер генә дә кул кушырып утырырга вакыт юк, - диләр Мироновлар.