Иске Элмәле егете зур самолетларның бортмеханигы булган

Гади авыл малае мәктәптә дә тырышып укый, Яңа Элмәле урта мәктәбен тәмамлагач, армия хезмәтенә китә. Владимир Германиядә гомумхәрби гаскәрләр составында өч ел хезмәт итә. Шунда ул рядовойдан алып өлкән радиотелефонистка һәм гарнизон полкының казначей-кассирына кадәр күтәрелә. Якташыбыз алга карап фикер йөртә, авиация хакындагы хыялын тормышка ашыру өчен акча кирәклеген уйлап, ике елга контракт төзеп, хезмәттә кала.

Биш ел армия хезмәтеннән соң Владимир Тимофеевич 1965 елда Тамбов өлкәсендәге Кирсан очу техник училищесына укырга керә. Аны тәмамлаган һөнәрле егет 1968 елда Уфа шәһәрендә аэродромда җирдәге бортмеханик булып эшли башлый. Ә 1971 елдан АН-24 самолетында, соңрак исә ТУ-134 самолетында бортмеханик вазифаларын башкара. 1977 елда Владимир Тимофеевичның хыялы чынга аша,  СССР чикләрендә пассажир рейсларында экипаж составында оча башлый. 1984 елда ул техник хезмәт лейтенанты һәм өлкән лейтенант дәрәҗәсенә ирешә. Якташыбыз шул елны МИ-8 һава судносының бортмеханигы вазифасында төнге очышларга рөхсәт ала. Соңрак йөкне тыштан асып ташу буенча очышларга кертелгән.

Владимир Захаров 48 яшенә кадәр күкләрне иңли. Хезмәт стажы тулып, очышлардан азат ителгәч тә, аэропротта авиотехник булып эшен дәвам итә.

Аны коллективта  хөрмәт итәләр, тырыш хезмәтен җитәкчелек тә бәяли, бик күп Рәхмәт хатларына, Мактау грамоталарына ия була, 7000 сәгать авариясез очкан өчен күкрәк билгесе белән бүләкләнгән хезмәт ветераны.

Бүген якташыбыз Уфа шәһәрендә гомер итә.