Якты Тау авылындагы күмәк эшләр өчен 30ар, 50шәр мең сум бирүчеләр булган

Бу авылда соңгы елларда гына да тәрәзәләре кадакланган алты-җиде йорт ачылган. Яшьлекләре биредә узган яктытаулылар, пенсиягә чыккач, туган авылларына кайтып йортлар төзиләр. Торак пункт трассадан еракта, Аксубай районы чигендә үк урнашса да, яшәү өчен бик уңайлы һәм матур да. Җәй айларында 65-70 йортның тәрәзәләрендә ут кабынса, кышын унлап йорт “ятим кала”.

-Халкыбыз бик актив һәм тырыш. Кайтып төпләнүчеләр пенсия яшендәгеләр, авылда яшьләр аз булуы гына күңелгә шом сала, - ди авыл мәчете имамы Ислам Нотфуллин. – Авылдашлар дингә тартыла, биш вакыт намазга чакырып азан яңгырый, мәчеттә җомга намазына 15-18 кеше җыела, гадәти көннәрдә бераз азрак. Дин йортыбыз сәдака акчалары хисабына яши. Читтә яшәүче авылдашларыбызның да ярдәмен тоябыз.

1992 елда ачылган мәчетне ел саен төзекләндереп торалар. Әлеге эшләр барысы да иганәчеләр булышлыгы белән башкарыла. Мәчетнең верандасын яңартып ясарга планлыйлар. Кирәк-яраклар саклау өчен яңа склад төзү нияте дә бар. Яктытаулылар гошер сәдакаларын да беренчеләрдән булып җыеп тапшырганнар.

-Быел зират тирәсен тотып алдык, бу эшкә 30ар, 50шәр мең сум бирүчеләр булды, - ди авыл имамы. – Мәчет түбәсен төсле калай белән япканда берәү материал өчен 130 мең сум акча күчерде һәм кем икәнлеген әйтмәскә кушты.