Кайбер чирмешәнлеләр чүплекнең кайда икәнен белми

Район үзәгендә яшәүчеләрнең күбесенә су суыртып алынучы каптаждан ерак та түгел урынга әллә ничә олау чүп илтеп актарганнар.

Кайбер чирмешәнлеләр каты көнкүреш полигонына да юлны белми бугай, чүпләрен янәшәдәге посадкага гына ташлап калдыру - табигатькә хөрмәтсез караш билгесе. Төягән калдыкларыңны тагын йөз метр чамасы арырак, чүплеккә кадәр илтү кыен, күрәсең?!

-Тиешсез урында, хәтта иген кырлары кырыена теләсә нәрсә ташлап китүчеләр артыннан җыештырып туйдым инде, - ди Чирмешән авыл җирлеге башкарма комитеты җитәкчесе Светлана Ганиева. -Бу эшкә мәктәп укучыларын, оешмалар хезмәткәрләрен дә җәлеп итәргә туры килә. Күпчелек санитар кагыйдәләрне санга суга, әмма чисталыкка битарафларны катырак җәзага тартырга кирәк.