Чирмешәндә безнең төбәкнең “Ел укытучысы – 2021” бәйгесе җиңүчеләре көч сынаша

Кадрия Гамирова, 17 февраль 2021 - 11:16

4138

Чирмешән лицеенда “Россия ел укытучысы” Бөтенроссия конкурсының төбәк туры башланып китте. Ике көн дәвам итәчәк бәйгедә Чирмешән, Спас, Әлки, Нурлат, Яңа Чишмә, Аксубай районнарының муниципаль этап җиңүчеләре көч сынаша.

Чирмешәндә безнең төбәкнең “Ел укытучысы – 2021” бәйгесе җиңүчеләре көч сынаша

-Беренче көнне Чирмешән, Спас, Әлки районнарының “Ел укытучысы” һәм “Педагогик дебют” номинацияләре һәм алты районның “Иң яхшы татар теле укытучысы” номинациясе җиңүчеләре ярыша, - ди район мәгариф бүлеге җитәкчесенең укыту эшләре буенча урынбасары Светлана Севастьянова. – Ә 18 февральдә Нурлат, Яңа Чишмә, Аксубайның иң яхшы укытучыларын каршы алабыз. Педагоглар лицей укучылары белән ачык дәресләр уздыралар һәм хезмәттәшләренә мастер-класслар күрсәтәләр. Аларның эшләрен дәрәҗәле жюри бәялиячәк.

Безнең район данын 1 нче Чирмешән мәктәбенең химия укытучысы Елена Жарова, Чирмешән лицееның башлангыч сыйныфлар укытучысы Гөлчәчәк Ибраһимова, Югары Кармалка мәктәбенең география укытучысы Лилия Серова һәм Чирмешән кадетлар мәктәп-интернатының татар теле һәм әдәбияты укытучысы Әлфинә Гарифуллиналар яклый.

Бәйгедә катнашучы барлык укытучыларга да сертификатлар тапшырылачак. Төбәк турлары тәмамлангач, иң яхшы укытучылар сайлап алынып, иң-иңнәр апрель аенда Казанда очрашачак.

фото: автор