Иске Үтәмеш мәктәбендә информатика кабинеты яңартылган

Кабинетның тәрәзәләре алмаштырылган, идән һәм түшәмне яңартканнар, стеналарны шомартып буяганнар. Бу эшләргә 700 мең сумнан артык акча тотылган. 
3 миллион сумга җиһазлар алынган.

–Үткән елның сентябрендә “Путь к успеху” конкурсында катнашырга гариза тапшырдык һәм грант оттык. Быел инде информатика дәресләре, төрле чаралар, олимпиадалар җиһазландырылган, иркен, якты, матур кабинетта алып барыла, – диде мәктәп директоры Миләүшә Шәйхетдинова. –“Компьютер клубы” түгәрәге дә эшли. Ул да шушы кабинетта уза. 5–8 класс укучылары, 15 бала, атнага ике сәгать шөгыльләнә. Бу кабинет – укучыларга зур бүләк, укытучыларга да ярдәм. Ачык дәресләр үткәрү өчен бик җайлы.

Әлеге кабинетта бишәр моноблок һәм ноутбук, төсле һәм 3D принтерлар, интерактив панель урнаштырылган, укучылар  өчен уңайлы өстәлләр, урындык-
лар да алынган.
Әлеге мәктәптә 29 укучыга 13 укытучы белем бирә. Бу уку елында 1 нче сыйныфка 1 укучы килгән, 9 нчы сыйныфта да бер бала укый, ә менә 2 нче сыйныф бөтенләй юк. 
Быел шундый ук грант акчаларына Әккәрәй, Ивашкино, Бәркәтә, Лашман мәктәпләрендә кабинетлар яңа төс алдылар. 2023 елда 1 нче Чирмешән мәктәбендә һәм Чирмешән лицеенда, 2022 елда Күтәмә мәктәбендә һәм шулай ук лицейда нефтьчеләр ярдәме белән җиһазландырылган кабинетлар барлыкка килде.

Миләүшә Шәйхетдинова фотолары