Чирмешәнлеләрне Халыклар бердәмлеге көненә багышланган тантанада бүләкләделәр

Бу көнне биредә Татарстанның мәдәни башкаласы бәйгесенә йомгак ясап, республика чараларында актив катнашучыларны бүләкләгәннәр.

Район башкарма комитеты җитәкчесе урынбасары Ләйләгөл Мөхсиновага, мәдәният бүлеге начальнигы Наталья Иляевага, Бәркәтә авылы мәдәният йорты сәнгать җитәкчесе Альмир Жораевка республиканың Мәдәният Министрлыгының Мактау грамоталарын тапшырганнар.

Район мәдәният йорты методисты Агриппина Рыбакова “Профессионал” номинациясендә җиңү яулаган һәм 70 мең,  район мәдәният йорты каршындагы театрның сәхнәгә кую бүлеге мөдире Тәзкия Кәримова һәм Әккәрәй авылы китапханәчесе Ольга Ефимова, иң яхшы мәдәният хезмәткәре буларак 50 мең сум акчага сертификатка ия булганнар.

Үзәк китапханәнең методик бүлеге мөдире Светлана Мортазинаның һәм балалар сәнгать мәктәбе укытучысы Рәмзия Федотованың проектлары да югары бәяләнгән һәм алар 150шәр мең сумлык сертификатлар белән бүләкләнгәннәр.

Татарстанның чигелгән картасына өлеш керткән якташларыбыз: Бәркәтә авылыннан китапханәче Әлфия Сөләйманова һәм пенсионер Шәригә Сәгыйрова, балалар сәнгать мәктәбе укытучылары Фәйзелхак Вилданов, Алинә Дәүләтшина һәм Наталья Султанова ТР Мәдәният министрлыгының Рәхмәт хатлары белән кайтканнар.

Лидия Квакова фотолары