Туймәт авылының мактаулы тракторчысына 90 яшь тулды

Бөек Ватан сугышы башланганда әле 10 яше дә тулмаган, зур гәүдәле малайга, башка яшьтәшләре кебек, олылар белән бертигез эшләргә тулы килә. Әтисе сугышка киткәч, дүрт бала белән калган әнисенең дә терәге була гаиләдәге олы малай - Габдерәхим. Әтиләре сугышта хәбәрсез югала, аның кайда җирләнүе дә берничә ел элек кенә билгеле булган.

Габдерәхим Гатаулла улы ничә трактор туздырганын төгәл генә хәтерләми дә.

-Җәй дә, кыш та колхозда тракторларга эш бетмәде. Кышкы суыкларда да Шенталага - ташкүмергә, Нурлатка жомга йөри идек, – дип әлеге елларны искә алды юбиляр. – Суыкларда ул тракторларны кабызуларны, сәгатьләр буена чиратта торуларны искә төшерсәң дә авыр булып китә.

Армия хезмәтеннән кайткан Габдерәхим авылдашы Мөнәвәрә белән гаилә корып биш бала үстерәләр. Кызганыч, биш ел элек 62 ел гомер иткән хатыны дөнья куйган. Аңа кадәр бер улларын да җирләргә туры килә аларга.

Улы Габдулла, килене Розалия тәрбиясендә матур картлык кичерүче Габдерәхим Сафинның юбилеенда балалары, оныклары, оныкчыклары төп йортта бергә җыелып, зур бәйрәм оештырганнар. Туймәт авыл җирлеге башлыгы Айдар Кәримов юбилярга район башлыгы исеменнән котлау ирештергән һәм истәлек бүләге тапшырган.