Урманасты Үтәмештә янгын бер гаиләне тораксыз калдырды

Ярый әле, гаилә әгъзалары янгын кисәтү җайланмасының – сигнализациянең көчле тавышына  уянып, урамга чыгып өлгерәләр.

-Янгын кирпечтән төзелгән өйгә зур зыян салган, өйнең түбәсен, верандасын яңа баштан ясарга кирәк, тәрәзәләрен алмаштырырга, гомумән, торакны яшәү хәленә кайтару өчен байтак средстволар таләп ителә, - диде Яңа Чишмә һәм Чирмешән районнарындагы янгын күзәтчелеге хезмәте дознавателе Фәнил Гыйззәтуллин. - Хәзерге вакытта янгынның сәбәпләре ачыклана.

Бер атна дәвамында районда инде икенче гаилә янгын чыгу сәбәпле тораксыз калды. Ел башыннан район территориясендә барлыгы җиде янгын чыгу очрагы теркәлгән, шуларның бишесендә – ут торак йортларга зыян салган.

Янгын күзәтчелеге белгечләре янгын куркынычсызлыгы кагыйдәләре хакында кабат искәртә. Электр, газ җиһазларын, мичләрне караучысыз калдырмаска, тузган электр чыбыкларын  вакытында алмаштырырга кирәк. Бала-чагага күз-колак булу зарур. Мунча мичләрен дә артык кыздырудан сакланыгыз.