Чирмешәннең тарихи валында яшь наратлар тамыр җибәрә

Урманчыларның бу елга агач утыру сезоны шуның белән тәмамланган. Ә питомникта әле эшләр дәвам итә. 10 сутый мәйданда корычагач орлыклары чәчелә, ә бераз соңрак, беренче суыклардан соң 12 сутый мәйданда каен орлыклары җиргә күмдереләчәк. Утыртылачак орлыкларны алар үзләре әзерли, агач үсентеләренә ихтыяҗ гел бар.

- Быел урман фондында 34 гектарда урманнарны яңарттык: урман эчендә киселгән мәйданнарга, аланлыкларга, печәнлекләргә чыршы, нарат, имән, каен үсентеләре утырттык, - диде Чирмешән урманчылыгы җитәкчесе урынбасары Әлфинур Җиһаншина. – Әлеге яшь үсентеләр Светлогорск, Чирмешән, Чумачка авылларына якын урнашкан урманнарда тамыр җибәрде. Дәүләт йөкләмәсе буенча 63 гектарда чыршы, имән, каен үсентеләре өстәп утыртылды, ягъни тамырлана алмаган, корыганнарын яңартылды. Язгы һәм җәйге чорда явым-төшем бик аз булса да, утыртылган үсентеләр яхшы тернәкләнде. Моңа эшләрне барлык агротехник таләпләрне үтәп, кыска срокларда башкару хисабына ирештек.

Чирмешән урман хуҗалыгы һәм урманчылыгы коллективлары “Хәтер бакчасы” акциясеннән дә читә калмаганнар.

Яз көне Чирмешән һәм Лашман авыллары янында, компенсацион урманнарны торгызу буенча нарат, чыршы үсентеләре утыртканнар. Чирмешән тирәсендә – 41672, Лашман авылы янында 16464 төп урман культурасы тамыр җибәрәчәк.

Әлфинур Җиһаншина фотолары