Чирмешәнлеләр дә солдатларга оекбаш бәйлиләр

Лашман, Бәркәтә, Туймәт, Әмир, Яңа Элмәле һәм башка авылларда да “Солдатларга оекбаш бәйлибез” акциясенә актив кушылдылар.

Әмир авылында күпләп сарык асраучы бер генә хуҗалык - Исмәгыйль һәм Гөлсинә Сафиннар биргән сарык йонын хатын-кызлар авыл китапханәсенә җыелышып бергә эшкәрткәннәр.

-Йонны әүвәл бергәләшеп яздык, аннан соң аны эрләп, җепләреннән оекбашлар бәйләдек, - диде китапханәче Гөлшат Әгъләмова.

- Безнең оекбашларыбыз солдатларга барып җитеп, аларны җылытсыннар. Егетләребез исән-сау һәм тизрәк гаиләләренә, якыннары яннарына әйләнеп кайтсыннар иде, - диде авылның остабикәсе, әлеге игелекле эштән читтә калмаган ветеран Гөлнур апа Харисова.

Шушы көннәрдә Әмир авылы хатын-кызлары бәйләгән 15 пар оекбашны мобилизацияләнгән якташларыбызларга җибәргәннәр.

Яңа Элмәле хатын-кызлары да авыл мәдәният йортында, ике атна дәвамында кич утырып, 32 пар оекбаш бәйләп, солдатларга озатканнар.

Гөлшат Әгъләмова фотолары һәм видеосы