Чирмешән районының өлкәннәр йорт-интернатына бүләкләр китерделәр
Чирмешән районының элеккеге җитәкчесе Минсәгыйть Шакировның улы Рафаэль Минсәгыйть улы районның өлкәннәр һәм инвалидлар йорт-интернатында яшәүчеләрне, яннарына барып, Өлкәннәр көне белән котлады һәм бүләкләр тапшырды.
-Әти ел саен биредә яшәүчеләрне бәйрәм көнендә күчтәнәчсез калдырмады. Сезне бәйрәм белән котлыйм, барыгызга да исәнлек, тыныч тормыш телим, - диде Рафаэль Шакиров.
Бу көнне әби-бабайларны өлкәннәр һәм инвалидлар йорт-интернаты директоры Наил Мостафин да сөендерде, коллектив исеменнән азык-төлек пакетлары өләште, бәйрәм белән тәбрикләде.
-Әлеге бүләкләрне Казанда эшләүче эшмәкәр Альберт Фәхретдинов ярдәме белән алдык. Аңа бик зур рәхмәт. Гомумән, бу көннәрдә безгә кунаклар бик күп килә. Өлкән яшьтәге якыннарын туганнары котлый. Авыл җирлекләре башлыклары да якташларының хәлләрен беләләр, бәйрәм уңаеннан күчтәнәчләр китерәләр, - диде Наил Фоат улы.
Гөлсирә Шәрифуллина фотолары
Следите за самым важным и интересным в Telegram-каналеТатмедиа
Нет комментариев