Чаллы умартачысы Шешминканы интернет аша тапкан

Леонид Федорчукның Шешминкадагы умарталыгында, үзе әйтүенчә, 200ләп баш умарта оясы  бар. Хуҗасының алар янында кайнашып йөрүе иде, шуңа кортларның ачулырак вакытларына туры килдем бугай.

-Шешминканы интернет аша таптым, табигате ошады. Шунда йорт сатып алдым, - дип сүз башлады Леонид Юрьевич.

Уңган, ачык йөзле умартачы тумышы белән Украинадан икән. Заманында Чернобыль атом электр станциясендәге авария ликвидациясендә катнашкан ул, 145 көн дозиметрчы-разведчик булган, фаҗиганең  үзәгендә, торба янында йөргән. Соңрак, Яр Чаллыда эшләгән апасы янына кунакка килгәч, шәһәрне ошатып, 2008 елда шунда күченгән. Шешминкада умарталар асравына ике ел.

-Татарстанда умартачылык белән биш еллап шөгыльләнәм. Украинада, авылда әти умартачы иде, - ди 58 яшьлек әңгәмәдәшем.

Леонид Федорчук бездә күпләп кош-корт та асрамакчы. Шешминка авыл җирлеге башлыгы Марс Шәйхетдинов әйтүенчә, умартачылык һәм кош-корт асрау өчен аңа  буш торучы элеккеге больница биналарын һәм территориясен биргәннәр, эшләсен генә. Леонид Юрьевич  анда ремонт башларга җыена.

-Чаллыдан хәтле килеп йөрү мәшәкатьледер, бу сезгә кирәкме соң? – дим аңа.

-Кирәк, күңел өчен. Бу бер юаныч бит инде. Монда халык та яхшы, - дип мактап алды шешминкалыларны Федорчук.

Сүз уңаеннан, умартачы быел Яңа ел бәйрәменә Шешминка мәктәбе укучыларына, кечкенә балаларга тәм-том тутырылган 41 пакет бүләк иткән.

автор фотолары