Райондашларыбыз мәдәни мирас объекты — Чирмешән крепосте территориясендә ел саен үткәрелә торган «Татарстанның чиста урманнары» акциясе кысаларындагы экологик өмәгә үз өлешен кертте.
Чара район хакимияте хезмәткәрләрен, иҗтимагый оешмалар вәкилләрен һәм авыл активистларын берләштерде — алар мондагы урман һәм тарихи вал территориясен җыештырдылар.
«Экологик иминлек» милли проекты кысаларындагы акция 14 сентябрьдән 14 ноябрьгә кадәр уза.
-Республиканың табигый байлыгын саклап калу бары тик уртак тырышлык белән генә мөмкин. «Татарстанның чиста урманнары» проекты берьюлы ике бурычны хәл итә: урманнарны сәламәтләндерә һәм әйләнә-тирә мохиткә сакчыл мөнәсәбәт мәдәниятен формалаштыра. Бүген бу эш аерым әһәмияткә ия, чөнки без киләчәктә Геопарк составына керәчәк төп объектларны тәртипкә китерәбез, - диде өмәдә катнашкан район башлыгы урынбасары Надежда Гомәрова.
Өмәчеләр Чирмешән крепостеның тарихи валлары территориясен һәм урманның шактый өлешен чүп-чардан арындырдылар. Оештыручылар мондый инициативаларның экологик хәлне яхшырту белән бергә табигый һәм тарихи мирасны саклау өчен җаваплылык тәрбияләвен ассызыкладылар.
Чирмешән крепосте — планлаштырылган Геопаркның төп объектларыннан берсе. Якташларыбызның бу территорияне төзекләндерүдә катнашуы ЮНЕСКОның төп принцибын күрсәтә: табигатькә, тарихка һәм туган якка сакчыл мөнәсәбәт һәр кешенең шәхси өлешеннән башлана
Нет комментариев