Теләсә кем китапханәче була алмый

Китапханәбездә үз һөнәренең остасы, аңа күңелен биреп, китапларны яратып, аларга изге әйбер кебек караучы, китап укучыларны ихтирам итүче, аларның һәр соравына җавап табарга тырышучы һәм кемнең нинди әсәр укырга яратуын белүче китапханәче Рушания Гыйрфанова эшли. Инде 27 ел биредә хезмәт куя ул.

Рушания апаның уңганлыгына, булганлыгына, өлгерлегенә сокланабыз. Аның китап укучылары бик күп. Ул даими рәвештә белемен арттыра, үз өстендә эшли, төрле бәйгеләрдә катнашып, җиңүләр яулый, грантлар ота. Китапханәбез бик матур, эшләр өчен бөтен шартлар бар.

Теләсә кем китапханәдә эшли алмый, анда Рушания апа кебек сүз остасы да, психолог та булу кирәк.

Кыскасы, хезмәттәшебез бар эшкә дә өлгерә. Яшли тол калып та сыгылмады, ике улын ялгызы тәрбияләп үстерде, читтән торып югары белем алды.

Форсаттан файдаланып, барлык матур сыйфатларны үзенә туплаган Рушания Миннәхмәт кызын һөнәри бәйрәме белән тәбрик итәм, аңа иҗади уңышлар телим. Тагын озак еллар яраткан хезмәтеннән тәм табып эшләргә насыйп булсын.

Рузилә Мөхтәсимова.

Иске Кади авылы.

Р. Гирфанова шәхси архивыннан фотолары