Кышны кайчан көтәргә?

Атна башында Россия Гидрометеорология үзәге җитәкчесе Роман Вильфанд сишәмбе-чәршәмбе көннәрендә ил төбәкләренең 85 процентында кар явачак, дип фаразлаган иде. Шулай булды да. Әмма бу вакытлыча гына, ди синоптиклар.

КФУның метеорология, климатология һәм атмосфера экологиясе кафедрасы доценты Тимур Әүхәдиев, быелгы ноябрь узган елгысыннан җылырак булачак, дип фаразлый.

– Ноябрьдә уртача айлык температура нормадан 0,5–1 градуска югарырак булачак. Кыш алдыннан һава торышы тотрыксыз була. Шуңа күрә көзнең соңгы аенда һава торышының еш үзгәреп торуына аптырыйсы юк. Кар 15–17 ноябрь аралыгында ятар дип көтәбез, – ди ул.

Балтач районының Яңгул авылында яшәүче «халык синоптигы» Әмир Шәрәфиев, чын кар 20 ноябрьдән соң гына ятачак, дип ышандыра. Аңа кадәр көннәрнең ике тапкыр яхшы ук җылытасы бар икән әле.

– Бу атна ахырында бик җылы булачак. Ноябрь ахыры – декабрь башында да җылытып алачак. Соңгысын халык телендә, агач сарысын чыгару, дип йөртәләр. Ник дигәндә, бу чорда агачлардан сары тамчылар тама. Шуннан соң чын кыш башлана. Ноябрьнең икенче яртысында кар ятачак, – ди «халык синоптигы». – Быел көз бик матур килде. Әмма ул үсемлекләр өчен бик начар булды. Аның аяныч нәтиҗәләре яз көне күренәчәк. Уҗымнар кышка бик начар булып керә. Коры көз печән өчен дә файдага түгел. Кар әйбәт ява күрсен! Болай да зәгыйфь булган быелгы уҗымга өшемәс өчен кар кирәк.

Әмир Шәрәфиев, декабрь башында кар шактый явачак, дип фаразлый. Яңа елдан соң – гыйнварның беренче яртысында да кар күп булачак, дип ышандыра ул.

– Шулай да кар узган елгы сыман чамадан тыш күп яумас. Быел кыш башы шактый салкынча булыр. Кыш азагында да дәвамлы аномаль суыклар көтелә, – ди «халык синоптигы».  

Татарстан Гидрометеорология үзәгеннән хәбәр итүләренчә, шимбә көнне республикада 4 градуска кадәр җылыта, яңгыр явачак. Юлларда бозлавык көтелә. Ял көне төнлә 0…+3 градус, көндез +2…+5 градус җылы булачак.  

Ноябрьгә халык сынамышлары: 

9 ноябрь нинди – май ае шундый. 

11 ноябрьдә болытлар түбән йөзсә, чатнама суыклар көтелә. 

15 ноябрьдә суык булып, әтәчләр кычкырса, көннәр җылытачак. Бу көнне тәрәзәдә бизәкләр хасил булса, язын яшеллек мул булыр.

20 ноябрьдә ала каргалар төркемләп очса яки тавышланса, иртәгә кар явачак. Бу көнне боз катса, димәк, башкача җылытмаячак.

25 ноябрьдә иртән вак яңгыр сибәләсә, кичкә суытыр.

29 ноябрь көнне юеш – кар, буранга.

30 ноябрьдә кояшлы икән, кыш кояш белән әллә ни сөендермәс, көн суык булса, кыш суык булыр.

чыганак