Чирмешән районы территориясендә коры үләннәр һәм чүп яндырырга ярамый

Быелның 15 апреленнән Татарстан урманнарында янгын куркынычы сезоны башланды. 22 апрельдән 12 майга кадәр республика территориясендә махсус янгынга каршы режим керттеләр. Бу вакытта коры үләннәр һәм чүп яндыру катгый тыела.

Әлеге чорда янгын куркынычсызлыгы таләпләрен үтәмәгән өчен административ җаваплылык ике тапкыр арта. Мәсәлән, гражданнар өчен штрафлар - 10-20 мең, вазыйфаи затлар өчен – 30-60 мең сум, ә юридик затлар өчен 400-800 мең сум тәшкил итәчәк.

-Узган елларны районда урман янгыннары теркәлмәде. Монда урман хуҗалыгы һәм авыл җирлекләре башлыкларының бу юнәлештә яхшы эш алып баруларын билгеләргә кирәк. Быел да урманчылар янгын куркынычы сезоны башланганчы кайбер урыннарда коры үләннәрне яндырдылар, янгынга каршы минеральләштерелгән  яңа полосалар ясадылар, моңа кадәр сызылганнарын тәртипкә китерделәр, - диде  135 нче янгын часте начальнигы Фәрит Яруллин. – Форсаттан файдаланып, халыкка да мөрәҗәгать итәсе килә: үзегезне һәм табигатьне уттан саклагыз! Ял итегез һәм эшләгез, ләкин бары тик янгын куркынычсызлыгы кагыйдәләрен үтәп һәм сәләмәт акыл белән эш итегез.