Чирмешән районының “Ильхан” җәмгыятендә сенаж салуга керештеләр

-Сенажга люцерна салабыз, савым сыерларына – яхшы, майлы азык, - ди вакланган үләнне куәтле трактор белән таптатып торучы механизатор Илсур Билалов.

“Ильхан” җәмгыте баш инженеры Илдар Хәнәфиев әйтүенчә, бүген алар хуҗалыгында 1504 баш мөгезле эре терлек исәпләнә, шуның 684е – савым сыеры.

Җәмгыятьнең ферма территориясендәге сенаж базларында былтыргыдан калган азык запасы да шактый.

Белгеч сүзе. Ильяс Гатауллин, район авыл хуҗалыгы һәм азык-төлек идарәсе җитәкчесе урынбасары:

-Хәзер азык үләннәренең иң сусыл, витаминнарга бай чагы. Сенажга салырга, печәнгә әзерләргә дә вакыт. Әгәр үлән чәчәк атты икән, ул азык түгел инде, шуның өчен аларны картайганчы, вакытында җыеп алырга кирәк. Район авыл хуҗалыгы җәмгыятьләрендә һәм крестьян-фермер хуҗалыкларында барлыгы 3039 баш мөгезле эре терлек асрала, шуларның 1212 савым сыеры. Бер баш шартлы терлеккә 40 центнердан да ким булмаган азык берәмлеге әзерләү зарур.

 Марат Гомәров фотолары