Чирмешән районы хуҗалыклары сөт җитештерүне арттыра баралар

“Сөлчә”дә бу күрсәткеч – 3000, “Әккәрәй”дә 2765 килограмм. Күмәк хуҗалыкларда, фермерларда тулаем район буенча, көнлек сөт җитештерү күләме 17 тонна тирәсе (былтыр  16 тонна булган).

- Сөт җитештерүгә бик күп кешенең өлеше керә,- ди “Ильхан” җитәкчесе Ильяс Хәнәфиев. – Азыкның да, хәтта фуражның да сыйфатлы, туклыклы булуы мөһим. Тегермәнчебез дә бик уңган безнең.

Газинур Галәүтдинов Югары Кәминкәдәге әлеге терлекчелек комплексына Кара Чишмәдән килеп эшли икән.

- Савым сыерларына, башка терлекләргә дә әллә ничә төрле бөртек, витаминнар бергә кушып чыгарылган катнашазык – монокорм бирәләр, - ди тегермәнче. – Якшәмбедән кала, мин һәр көнне 6 тонна чамасы продукция тарттырам.

Шул ук “Ильхан”да азыкны механикалаштырылган ысул белән кертеп тараталар. Яшь маллар да яхшы тәрбиядә.

- Хәзер, кышкы чор режимында сыерларны туйганчы ашатырга кирәк, - ди район авыл хуҗалыгы һәм азык-төлек идарәсе начальнигы урынбасары Ильяс Гатауллин.

Шәхси хуҗалыклардан сөт җыю буенча Түбән Кәминкә, Кармыш, Ивашкино, Чирмешән, Туймәт, Лашман авыл җирлекләре яхшы эшли. Барысын да исәпләсәң, шәхси хуҗалыкларның көнлек сөт тапшыру-сату күләме 10 тонна 689 килограмм (2021дә бу вакытта 7623).

Тапшырылган сөт өчен түләүдә проблемалар юк, бүген бер килограмм сөткә бәя 27-28 сум тирәсе (былтыр 21 сум).

Кадыйр Гомәров фотолары