Кара Чишмәдә бер йорт тулысынча янып беткән

-“Глонасс 112” системасы буенча кергән әүвәлге хәбәрдә мунча яна диелгән иде,- ди районның 135нче янгын-коткару часте начальнигы Фәрит Яруллин.-Соңрак утның каралты –кураларга һәм өйгә күчкәне билгеле булды. Бу вакытта өйдә 1937нче елгы бер апа гына булган. Аннан соң әле ут күршеләрнең сарайларына да капкан. Кызганыч, янгын нәтиҗәсендә йорт тулысынча янып бетте һәм инде аны торгызырга мөмкин түгел. Аномаль коры һәм эссе һава торышы шартларында корылмалар кибә һәм ялкын кабынып китү өчен кечкенә генә очкын да җитә. Кара Чишмәдә халык бик дус, бердәм, тиз арада бик күп кеше җыелды, алар безгә - янгын сүндерүчеләргә нык ярдәм иттеләр, утка таралырга мөмкинлек бирмәделәр. Форсаттан файдаланып, карачишмәлеләргә рәхмәтемне белдерәм.

Янгын сүндерүчеләр кабат электр җиһазларыннан файдаланганда янгын кагыйдәләрен төгәл үтәргә, спиртлы эчемлекләр белән мавыкмаска, урын-җир өстендә тәмәке тартмаска, балаларны үзләрен генә калдырмаска, игътибарлы һәм сак булырга киңәш итә. Онытмыйк: янгын үзеннән-үзе генә килеп чыкмый.

Фәрит Яруллин фотосы