Җил Түбән Чегодайда шиферларны алган, Туймәттә үсемлекләрне боз тишкәләгән
Әллә нишләде соңгы елларда бездә табигать. Искиткеч көчле гарасатлар, хәтта су басулар да булды районда. Инде менә тагын - узган якшәмбе көнне кайбер авылларда ярыйсы ук эре боз явып узса, Түбән Чегодайда җил түбә шиферларын кубарып, агачларны аударган.
-Көндезге өчләрдә яңгыр бер явып үтте, аннан сәгать бишләрдә тагын ямьсез кара болыт килеп бозлы яңгыр яуды. Бакчага чыгып караган идем, эрерәк яфраклы үсемлекләр: кәбестә, кыярларның яфракларын боз тишкәләгән, - ди Туймәттән Фәнисә Кәримова.
.jpeg)
Боз Бәркәтәдә, Лашманда, Яңа Элмәледә Әмирдә, Чирмешәндә, Утыз Имәндә һәм башка кайбер авыларда да булган, бәхеткә, зур зыян юк. Ә менә Түбән Чегодайда җил халыкка шом салып өлгергән.
-Күрше әбинең карт талын сындырып безнең йортка салды. Күз ачып йомганчы, бик тиз булды бу хәл, нык курыктык, - ди Түбән Чегодайга кунакка кайткан Рәмилә Дәүләтшина.
.jpeg)
-Айдар Галимов хужалыгының гараж түбәсеннән берничә шиферын каерып алды. Шифер кисәкләре җиргә кадалган, көчкә тартып алдык, нинди көч! Аллаһы Тәгалә саклаган инде, бу вакытта ул якта кеше, мал-туар булмаган. Җил Нурсинә апаларның өй сайдингын каергалаган, - диде шул ук авылдан Алсинә Әхмәтвәлиева.
Илһам Әбенәгыймов, Алсинә Әхмәтвәлиева фотолары
Следите за самым важным и интересным в Telegram-каналеТатмедиа
Нет комментариев