Татарстанда 20 апрельдән чәчтарашханәләр янә эшли башлый

Республикада 20 апрельдән чәчтарашханәләр янә ачыла. ТР Премьер-министры Алексей Песошин шул хакта документны имзалады. Әлеге карар Татарстан Хөкүмәте порталында чыкты, дип яза «Татар-информ» мәгълүмат агентлыгы.

Эшли башлар алдыннан хезмәткәрләрнең тән температурасын үлчәү таләп була. Клиентларны алдан язылу буенча кабул итәчәкләр. Һәр клиент арасында ун минутлык интервал, хезмәткәрләр арасында 1,5 метр ераклык булырга тиеш. Клиентлар арасындагы буш вакытта бүлмәне җилләтү, коралларны дезинфекцияләү башкарылачак.

Оешмалар һәм шәхси эшмәкәрләр хезмәткәрләренә антисептиклар, шәхси саклану чаралары — маска, респиратор, перчатка — бирергә тиеш.

Клиентларның кулларын дезинфекцияләү мөмкинлеге булу таләп ителә.

Чәчтарашханәгә бару өчен махсус смс-пропуск алырга кирәк. Моның өчен системага яңа унберенче максат өстәләчәк.

фото: Владимир Васильев