Су коенганда хәвефле авыру йога күрмәсен!
Су коенуларсыз нинди җәй булсын инде! Тик менә елга-күлләргә барып, хәвефле авыру эләктерә күрмәгез! Аның беренче билгесе - тән кычыту.
Елга, күл яки буада су коенып кайтканнан соң, тәнегез кычыта башлый икән, кичекмәстән дәваханәгә мөрәҗәгать итү кирәк. Бу хакта Елена Малышева белән "Жить здорово!" программасын алып баручы медицина фәннәре докторы Андрей Продеус үзенең Instagram сәхифәсендә яза.
Продеус язуынча, су коенганнан соң тән кычыту церкариоз авыруы эләгү хакында сөйли. Сулыкларда адәм баласының церкарий гельминтлары (паразит кортлар) белән зарарлану очраклары сирәк түгел. Әлеге кортлар тире астына үтеп керә һәм кешедә церкариаль дерматит башлана. Бу чирнең билгеләре бер атна тирәсе дәвам итә. Арытаба кортлар кеше организмында үлеп бетә. Әмма аерым очракларда гельминтларга көчле аллергик реакция кузгала. Менә шундый вакытта бронхлар зур зыян күрә, кеше бик нык шешенә. Вакытында медицина ярдәме күрсәтелмәсә, барысы да бик начар тәмамланырга мөмкин.
Су коенганда паразитлар эләктермәс өчен тыелган урыннарда су кермәскә, ләмле буалар һәм күлләрне урап узарга киңәш итә белгеч. Шул ук вакытта кошлар һәм әкәм-төкәмнәр күп булган сулыкларда гельминтлар эләктерү хәвефе аеруча зур икәнлеген дә искәртә ул. Су кергәннән соң, душта коенып чыгу, тәнне тастымал белән яхшылап корыту хакында онытмагыз, ди табиб.
фото: https://pixabay.com/ru
Следите за самым важным и интересным в Telegram-каналеТатмедиа
Нет комментариев