Республикада төзелергә тиешле торакның өчтән бер өлеше файдалануга тапшырылган

24 апрельгә булган мәгълүматларга караганда, Татарстанда ел башыннан 887,1 мең квадрат метр торак файдалануга тапшырылган, бу планның 29,8 процентын тәшкил итә. Әлеге турыда Татарстан Республикасы Хөкүмәте Йортында узган республика киңәшмәсендә ТР төзелеш, архитектура һәм торак-коммуналь хуҗалыгы министры Фәрит Хәнифов әйтте, дип җиткерә республика җитәкчесенең матбугат хезмәте. Бу хакта «Татар-информ» мәгълүмат агентлыгы яза.

Киңәшмәне барлык муниципаль районнар белән видеоконференция режимында Президент Рөстәм Миңнеханов уздырды. Анда Премьер-министр Алексей Песошин да катнашты.

«Ике атна эчендә торак тапшыру динамикасы 48,0 мең квадрат метр тәшкил итә», - диде Республиканың Төзелеш министрлыгы башлыгы.

Аерым алганда, ТР Президенты каршындагы Дәүләт торак фондының инвестицион программасы буенча 20,5 мең квадрат метр мәйданлы 363 фатирлы 11 йорт төзелгән. Бу планлаштырылганның 7,5 процентын тәшкил итә.

Күп фатирлы инвестицион торак программасы буенча 2020 елда Татарстанда 1 млн 317,2 мең квадрат метр мәйданлы 177 күп фатирлы йорт төзү планлаштырыла. Нигездә, бу – өлешчеләр акчасына иске кагыйдәләр буенча төзелә торган инвестицион торак, дип аңлатты докладчы.

Хәзерге вакытта 348,0 мең квадрат метр мәйданлы 49 күп фатирлы торак йорт файдалануга тапшырылган, бу планның 26,4 процентын тәшкил итә. Моннан тыш, 68 йорт әзерлекнең югары дәрәҗәсендә, 51 йорт әзерлекнең уртача дәрәҗәсендә, тагын тугыз йорт түбән әзерлек дәрәҗәсендә тора.

Моннан тыш, республикада бер ел эчендә 1 млн 388,2 мең квадрат метр мәйданлы 10 мең 680 шәхси йорт төзергә җыеналар. 518,6 мең квадрат метр мәйданлы 3 мең 990 йорт сафка бастырылган инде - планнан 37,4 проценты.

Татарстан Республикасы Төзелеш министрлыгы җитәкчесе шулай ук 2020 елда ул җитәкләгән ведомствоның РФ Президенты Владимир Путин инициативасы белән алты илкүләм проектны гамәлгә ашыруда катнашуын искәртте. Бу - «Демография», «Торак һәм шәһәр мохите», «Экология», «Мәгариф», «Сәламәтлек саклау» һәм «Мәдәният». Аларны финанслау күләме 15 млрд сумнан артып китә.

фото: Архив/ Рамил Гали