Конституциягә кертелгән төзәтмәләрдә беренче тапкыр яшьләр искә алына

Россия Дәүләт Думасының безнең республикадан сайланган депутаты Марат Бариевның яшьләр сәясәте турындагы төзәтмәсе Төп законга төзәтмәләрнең ахыргы вариантында узды. Ул Татарстан депутатлары тарафыннан кертелгән бердәнбер кабул ителгән төзәтмә булды, дип хәбәр итә «Татар-информ» мәгълүмат агентлыгы.

«Бу яшьләр мәнфәгатьләрен яклау һәм аңа ярдәм итү өлкәсендә законнарны эшләү һәм кабул итү өчен нигез бирә. Иң мөһиме — бу Конституциягә таянып, яшьләр сәясәте турында әлегә кадәр булмаган Федераль законны кабул итәргә мөмкинлек бирәчәк», -  диде депутат Бариев.

Парламентарий әйтүенчә, элек Конституциядә яшьләр дә, яшьләр сәясәте төшенчәләре дә булмаган. Төзәтүләр нәтиҗәсендә исә күп кенә киртәләр җиңеләчәк.

Кертелгән төзәтмә Төп законның Россия һәм аның субъектларының уртак карамагына кагыла торган 72 нче маддәсенә кагыла. Үзгәрешләр нигезендә, мәгариф, мәдәният, сәламәтлек саклау һәм тәрбия белән беррәттән, анда яшьләр сәясәте дә искә алыначак, дип өстәде Марат Бариев.

Фото: Солтан Исхаков.