Казанда коронавирустан бер кеше үлгән, Чирмешәндә бу чирне йоктыручы юк

Вафат булган 57 яшьлек ир-атны, югары тән температурасына һәм хәлсезлеккә зар белән, 13 майда больницага салганнар. Ни кызганыч, авыруның гомере 20 майда өзелә. Аның башка авырулары да булган.   

Шөкер, үткән тәүлектә Чирмешәндә коронавирус йоктыру очрагы теркәлмәгән.  Ә менә Казанда бу авыруның – 24, Яр Чаллыда – 23, Түбән Камада – 7, Апаста – 6, Балык Бистәсендә – 4, Яшел Үзәндә- 3, Питрәчтә – 2, Әлмәт, Әтнә, Биектау,  Лаеш, Саба районнарында берәр яңа очрагы расланган.

Авыруларның  24се больницаларга озатылган, 51е өйдә дәвалана – аларда авыруның җиңел яки симптомсыз формасы.

Татарстанда 22 майга коронавирус йоктыруның барлыгы 2621очрагы теркәлгән.  

Зинһар үз-үзегезне саклагыз!