Чирмешәндә бабайлар истәлегенә велойөреш уздырдылар

Чирмешән яшьләре Бөек Җиңү бәйрәменә багышлап, велойөрешкә чыкты. 72 еллык уңаеннан, алар символик 7200 метр ара узарга булганнар.

Яшьгвардиялеләр оештырган акциядә ике дистәгә якын велосипедчы катнашты. Егетләр, кызлар Җиңү паркындагы "Азатлык сугышчысы" һәйкәле яныннан кузгалып, Чирмешәннең әйләнгеч юлын, Кече Чегодай янындагы юл чатын, район үзәге урамнарын узып, янә Җиңү паркына кайттылар. Каршы җил, кыен юл участоклары булуга карамастан, катнашучылар барысы да финишка исән-сау, яхшы кәеф белән килеп җиттеләр. Велойөреш дистанциясен яшьләр һәм спорт эшләре бүлеге җитәкчесе Илдус Мәссаров, район Советы депутаты Ирек Нуртдинов та уздылар.